UKO ISHYAKA PL RYAKIRIYE IBITEKEREZO BIKUBIYE MU MUSHINGA W’IVUGURURWA RY’ITEGEKO NSHINGA RYA REPUBULIKA Y’U RWANDA RYO KUWA 04 KAMENA 2003 NKUKO RYAVUGUWE KUGEZA UBU

Nyuma y’uko Inteko Ishinga Amategeko y’u Rwanda/Umutwe w’Abadepite itoreye kandi ikemeza umushinga w’ivugururwa ry’Itegeko Nshinga rya Repubulika y’u Rwanda ryo kuwa 04 Kamena 2003 nkuko ryavuguruwe kugeza ubu; Ishyaka Riharanira Ukwishyira Ukizana kwa buri Muntu / PL ryishimiye uwo mwanzuro kuko n’abayoboke baryo bari babisabye.

Urugendo rw’ Ishyaka Riharanira Ukwishyira Ukizana kwa buri Muntu / PL mu gahunda yo kugeza ku Nteko Ishinga Amategeko ubusabe bw’abayoboke baryo ku mushinga w’ivugururwa ry’Itegeko Nshinga rya Repubulika y’u Rwanda ryo kuwa 04 Kamena 2003 nkuko ryavuguruwe kugeza ubu:

-  Tariki ya 29 Werurwe 2015 Inama y’Igihugu y’Ishyaka PL yahaye ububasha Komite Nyobozi bwo gufata icyemezo mu mwanya wayo ku birebana n’ivugururwa ry’Itegeko Nshinga;

-  Tariki ya 22 Gicurasi 2015 abagize Komite Nyobozi y’Ishyaka Riharanira ukwishyira ukizana kwa Buri Muntu / PL bagejweho raporo ya Komisiyo Politiki, Uburinganire n’ubwuzuzanye hagati y’abagabo n’abagore y’Ishyaka PL yahawe inshingano yo kwakira no kwegeranya ibitekerezo by’abayoboke b’Ishyaka PL mu Gihugu hose.

Aho basanze abayoboke ba P.L basaba ko ingingo y’101 y’Itegeko Nshinga ku bijyanye n’umubare wa manda za Perezida wa Repubulika yavugururwa, banasaba ko Ubuyobozi bw’Ishyaka PL bwageza icyifuzo cyabo ku Nteko Ishinga Amategeko igatangiza ivugururwa ry’Itegeko Nshinga nk’uko biteganywa n’ingingo ya 193 yaryo ndetse twanatanze n’ibitekerezo no ku zindi ngingo z’Itegeko Nshinga zikwiye kuvugururwa.

-  Taliki ya 16 Kamena 2015 icyifuzo cy’abayoboke ba PL cyashyikirijwe Inteko Ishinga Amategeko/Umutwe w’Abadepite.
-  Ishyaka PL ryishimye ko ibitekerezo ryatanze, Umutwe w’Abadepite wabyitayeho mu kuvugurura Itegeko Nshinga
-  Twari twagaragaje ko Itegeko Nshinga dufite ubu ririmo ibibazo by’Imyandikire itanoze n’indimi zidahuye (interuro zitanditse neza, ingingo zidafite inyito ndetse ugasanga harimo n’amagambo atuma bigorana gusobanukirwa ibyo ingingo zimwe na zimwe zishaka kuvuga hakaba rero hari hakenewe kunozwa imyandikire yayo no guhuza indimi, hakoreshwa ibiteganywa mu myandikire inoze y’amategeko. Hari ingingo ziri mu mwanya udakwiye no kutagira ishakiro (hari ingingo zahinduriwe umwanya zarimo. Inyinshi mu ngingo usanga zari mu Mitwe idafitanye isano na zo mu gihe hari indi Mitwe zashyirwamo zikarushaho kumvikana, Itegeko Nshinga kandi ntiryari rifite ishakiro. Ibi bikaba bitorohereza abarikoresha. Ibintu byinshi byashyizwe mu Itegeko Nshinga (ibintu byinshi byagombye kuba biri mu yandi mategeko. Ibi bigaragara cyane mu ngingo zijyanye n’Ubutegetsi bw’ubucamanza n’izindi nzego za Leta aho guteganya imirongo ngenderwaho (amahame rusange) ibindi bigashyirwa mu yandi mategeko.

-  Ingingo zitajyanye n’igihe Ingingo ya 152: Inkiko Gacaca. Twanasabye ko hateganywa uburyo bwo gukemura ibibazo bitarinze gusaba kuvugurura Itegeko Nshinga kuko ryari rimaze kuvugururwa inshuro enye zose. Aho byajya bikemurirwa mu yandi mategeko nk’amategeko ngenga. Ikindi ishyaka ryifuje ni ukugaragaza umwihariko w’Abanyarwanda wo kwishakamo ibisubizo.